_सिस्टरिन_बाई what a lovely poem

#_सिस्टरिन_बाई
••••••••••••••••••••••••••••••••••••••••••••••••••••••••
सिस्टरिन बाई....
पोलिओ,गवर आणि धनुर्वात बरोबरच...
एक थेंब बुद्ध ,
एक थेंब महावीर
आणि जमलंच तर
एक थेंब पैगंबर ही द्या माझ्या पोराला.
कारण
दंगलीच्या हंगामात दिवस गेलेत मला....
बाळंतपणाच्या आधीच
मी माझ्या आईला बोलले,
पोराला पांढऱ्या रंगाच्या कापडात गुंडाळ,
बाकीच्या कुठल्याबी रंगाचा आत्ता भरवसा नाय आपल्याला...
जातीच्या नाळपेक्षा,
मातीशी नाळ जोडावी माझ्या पोराची...
म्हणून नामदेवाच्या वाटीतल तूप,
तुकारामाच्या ऊसाचा रस,
नि मौलवीच्या ईद ची खीर बि प्याली म्या घटा घटा...
तरीबी वजन कमीच भरलं म्हण पोराचं
बहुतेक,
वजनाचं कारण भजनच असावं तुकोबाचं....
संचार बंदी मुळं कीर्तन, प्रवचन च झाली नाही ओ गरोदरपणात...
दोन ओव्या , चार भारुड ऐकली असती,
तर मेंदवाच वजन वाढलं असतं थोडं...
पण काळजी करू नका सिस्टरिनबाई....
फुल्यांच्या सावित्रीला सांगितलंय मी,
रोज तुझ्या हौदाच पाणी गरम करून
चोळून जात जा माझ्या पोराला...
धर्माचा बिर्माचा विषाणू डसू नये
म्हणून हल्ली तर न चुकता
सकाळचं पसायदान,
दुपारचं दास कॅपिटल आणि लयच
रडायल पोरगं तर संविधानाचं एखाद पान
देते मी चघळायला....
जातीची गटार तुंबायला लागली
की तापाची साथच येते माझ्या वस्तीत,
तवा कपाळावर पट्टीच ठेवते मी त्याच्या
चवदार तळ्याच्या पाण्यात बुडवलेली.....
सिस्टरिनबाई....
पोराच्या कपाळावर हात ठेवून सांगते,
गरोदरपणा परीस
जातीच्या कळा लई वाईट बघा...
म्हणून निरोप द्या माझा....
जलमाचा दाखला लिवणाऱ्या सायेबाला ,
धर्म आणि जात यांचा रकाना
रिकामाच सोड म्हणावं त्याला.
कारण, दंगलीच्या हंगामात दिवस गेलेत मला...
••••••••••••••••••••••••••••••••••••••••••••••••••••••••
काळजाला भिडणारी,
संवेदनांची परिसीमा गाठून सतत विचार करायला लावणारी हि कविता आहे...☝